12 Oct 2013 :) 雪梨雪耳紅棗糖水

踏入秋天要煲返d滋潤既糖水飲下，見超市d雪梨又做緊特價，就煲個雪梨糖水啦~

其實我落左好多材料: 雪梨、雪耳、紅棗、蓮子、龍眼肉，煲出黎真係好潤好好味~

呢碗係大B既，望落去好似加左雞蛋，其實係湯丸..搞到碗野好似好怪甘~

28 Sep 2013 貴婦 high tea :) Another Fine Day

適逄小女生日，好友約左我去中環太子台 high tea，好友話呢間都好爆下，淨係 book 到坐出面，最初我地驚會好熱，但後來發現坐出面好過坐入面，因為佢入面其實佈置到好似一個客廳甘，個日入面都爆哂，分別坐左 3 團人，佢地就係圍住中間既茶几坐，姐係大家完全聽到哂其他人講咩，反而我同好友坐出面可以盡情講盡情笑~

cafe 門口都幾易認，我地個日就係坐出面個張枱



個tea set 係standardise， 得飲品有得揀，我地分別要左 green tea latte 同普通latte，同埋叫左2人份既 tea set

 

呢度就己經係2人份量，其實真係食唔飽 =.= 不過佢每樣都好好味 =P

呢間cafe既賣點係可以寫封信比自己，大概一年後店員會將封信寄返比我地

信紙用好靚既盒裝住

打開就係甘

就係甘 hea 左一個下晏，盛惠 $440....甘既價錢當然可以去食好豐富既 lunch buffet，不過人有時就係要試下新野啦~

31 Aug 2013 :) 大埔梁九記白行記

今日要去屯門整野..諗住橫掂出到甘遠就順路去埋傳說中既大埔梁九記…哈哈其實屯門同大埔一d都唔順路..

山長水遠黎到先去大埔街市醫肚，梗係要試下東記炸豬扒麵啦，一去到無位，跟住佢隔離個間城仔記就問我地係咪食豬扒麵? 飲唔飲野? 飲野就坐呢度啦~ 原來東記炸豬扒麵係無野飲叫既，所以可以坐係城仔記d枱度叫野飲同叫埋隔離炸豬扒麵，大家互惠互利都幾識做生意禾~ 

炸豬扒雲吞米線 $27

d豬扒好林炸粉好薄，雲吞大大粒，甘既價錢真係又扺又好味 =P




城仔記 炸醬肉絲炆米 + 凍飲2杯

城仔記d野就一般般啦….




食飽飽諗住去梁九記掃貨啦，點知……..是日休息 =.=
隔離d師奶仲話: 嘩真係唔休做放甘耐假!

唉…甘唯有行下街市買d海鮮返去啦~

下次又要擇個吉日再黎~

20 Jul 2013 泡菜海鮮豆腐湯 :)

整左好好味既泡菜海鮮湯，用新鮮蝦之餘仲要攞d蝦頭蝦殼熬個湯，再保留蝦尾，真係鮮味百倍架~

泡菜海鮮豆腐湯
材料: 上湯4杯     新鮮蝦半斤       新鮮蜆半斤       洋葱1/4個       金菇1包      紹菜半棵
泡菜1碗        韓式辣醬2湯匙         滑豆腐一盒         芫茜1條
調味: 雞粉1湯匙     糖1茶匙

做法: 1. 蜆洗淨吐沙，蝦洗淨去頭及殼但不要剪掉蝦尾，保留蝦頭及蝦殼備用
2. 滑豆腐切件，金菇洗淨去頭撕開，芫茜洗淨切碎
3. 煲滾上湯，加入蝦頭及蝦殼煮20分鐘後隔渣成湯頭
4. 熱油鑊，爆香泡菜、洋葱及韓式辣醬，灒入熱的湯頭煮滾
5. 加入蝦、金菇、紹菜及豆腐滾20分鐘，再加入蜆及調味拌勻，最後灑上芫茜碎即成

大B Happy Birthday :) 芒果脆脆慕絲蛋糕

大B生日所以我整左大大個芒果慕絲蛋糕，不過用左我好多時間整，最後仲要請半日假裝飾埋尾 =P
我係早一晩做定個海綿蛋糕同朱古力脆脆，不過因為再隔一晩食就會林左，所以下次應該要去材枓鋪買朱古力脆珠，或者用返芒果夾心代替....不過好彩整體都好味既，無令大B失望 he.....



芒果脆脆慕絲蛋糕 (8吋圓形模)
海綿蛋糕材料: 蛋2隻 (100g)      砂糖40g      香草精油2滴       低筋麵粉40g      牛奶10g
牛油20g        6吋蛋糕模1個

脆脆材料: 脆米 50g        朱古力 70g

慕絲蛋糕材料: 海綿蛋糕2片    芒果茸250g     砂糖80g    魚膠粉18g     凍水6湯匙
淡忌廉500g    芒果2個切粒

鏡面裝飾材料: 芒果2個    芒果啫喱粉40g    魚膠粉1/2茶匙     熱水200ml

海綿蛋糕做法: 1. 蛋及牛油預先放室温2小時，蛋糕模底舖牛油紙備用
2. 牛油隔熱水座溶再放涼備用，預熱焗爐至170度10分鐘
3. 取一大碗，將雞蛋高速打2分鐘至起泡，分3次加入糖，再用轉快速打約20分鐘至不再流動可劃線
4. 低筋麵粉先過篩，分幾次加入蛋液中，用膠刮刀邊加邊輕手拌入至無粉粒
5. 加入牛油、牛奶及香草精油拌勻成蛋糕糊
6. 將蛋糕糊倒入蛋糕模內，抺平，輕拍幾下
7. 入焗爐用170度焗25分鐘，用竹簽插入如無黏物即可取出，倒轉後放涼脫模

脆脆做法: 1. 朱古力隔熱水座溶，溫度不要過熱，加入脆米混合後鋪於海綿蛋糕上冷藏半小時

慕絲蛋糕做法: 1.忌廉要預先雪凍
2. 將魚膠粉加凍水浸一會，海綿蛋糕剪成比蛋糕模稍細
3. 將芒果茸及砂糖隔熱水邊加熱邊攪勻備用，魚膠粉液同樣隔熱水加熱攪勻至溶
4. 將少量芒果茸先混合魚膠粉，再倒回大份的芒果茸中坐冷水攪勻
5. 將淡忌廉打起至仍然流動，加入芒果茸及芒果粒用膠刮刀拌勻至滑成慕絲料
6. 先將一片海綿蛋糕放入模，倒入一半慕絲料
7. 再放入另一片海綿蛋糕，倒入餘下的慕絲料抺平，雪4小時

鏡面裝飾做法: 1. 將所有材料拌勻後放涼，倒入己雪好的蛋榚面上，雪2小時
2. 蛋榚雪好後鋪上芒果片作裝飾即成

20 Jul 2013 :) 煎肉碎薯餅

上youtube無意中見到有人教煮煎薯餅，又想自己試下整，不過一下整得太多食左幾餐 =P





煎肉碎薯餅
材料: 免治豬肉 $15        薯仔4個        蒜蓉2湯匙       洋葱1/4個         雞蛋1隻
芫荽1條        粟粉1碗        麵包糠1碗
醃料: 生抽1湯匙           糖半茶匙         酒1茶匙           生粉1茶匙        水1茶匙      胡椒粉1/4茶匙 麻油1/4茶匙
調味: 雞粉1茶匙       糖1/2茶匙        鹽1/2茶匙        黑胡椒1/4茶匙          粟粉1湯匙

做法: 1. 豬肉用醃料拌勻後醃30分鐘，薯仔洗淨後連皮切粒
2. 煲內加入足夠蓋過薯仔面分量的水、加1茶匙鹽細火冚蓋烚薯仔15分鐘後瀝乾水
3. 洋葱切碎，雞蛋發勻成蛋液
4. 熱油鑊爆香蒜蓉及洋葱，加入肉碎炒散至6成熟後盛起待涼
5. 薯仔取出後去皮，加入肉碎料、調味料及一半蛋液攪勻至感覺沒有水份
6. 將薯仔料分成幾份，用手沾少許水，將每份薯仔料搓成圓球再沾滿粟粉，輕力壓平後雪30分鐘
7. 將薯餅先沾上餘下的蛋液再沾上麵包糠，拍走多餘的麵包糠
8. 熱鑊下2湯匙油，用細火將薯餅每面煎3分鐘至金黃，期間可加少許油，上碟

01 Jun 2013 海鮮大餐 :) 薑葱炒蟹+黃金蝦+果皮鮑魚仔

今日要慶祝大B終於考完試，温左成年書就係等呢一日..終於可以有多d時間陪我啦 =P 因為佢尋晩温到好夜所以決定唔出去食係屋企煮算啦..甘等我煮個陣佢可以去訓下教..但我一個人煮成餐真係手忙腳亂，淨係劏隻蟹我都戰鬥左好耐..不過今餐都算成功~

因為隻蟹太生猛，眼碌碌甘望住我搞到我唔敢砍佢....呢個薑葱炒蟹食譜係參考高師傅，真係好正，香味傳到去出面走廊.....

薑葱炒蟹
材料: 肉蟹1隻    蔥5棵    厚薑12片    蒜頭2粒     紹興酒適量     生粉水2湯匙      紅辣椒1隻
調味料: 上湯1/3碗     蠔油2湯匙     糖半湯匙      鹽1/3茶匙

做法: 1. 蒜頭稍拍後切碎，蔥切段後分開嫩葱及葱白，辣椒切絲
2. 蟹洗淨去掉胃、肺及蟹腳尖，蟹箝斬開節位並稍拍，蟹身斬件後抺乾水份，蟹蓋斬掉尖邊位
3. 將蟹件拍上少許的生粉
4. 燒熱3湯勺油，落薑及蟹件走油45秒後盛起備用 (先落蟹箝再落蟹身最後落蟹蓋)
5. 另熱油鑊，爆香蒜頭、紅辣椒及嫩葱，落蟹及灒酒兜炒一會
6. 加入調味料，冚蓋焗2分鐘，加入葱白焗1分鐘，最後加入生粉水埋芡即成

黃金蝦煮完出黎唔係好似黃金蝦，但變左另一味好好食既蝦 haha....因為出面食到既黃金蝦係成隻舖满哂咸蛋黃，脆到可以成隻連殼食，不過因為我怕肥所以只係落左3隻咸蛋黃，但都好味既...

黃金蝦
材料: 虎蝦10隻      咸蛋黃3隻        牛油2湯匙        蒜蓉1湯匙        葱花1湯匙
調味: 生抽2湯匙         水1/3碗

做法: 1. 蝦清洗乾淨但不要浸水，剪掉蝦頭、腳及尖刺，挑走蝦腸，於蝦背開邊
2. 用粗鹽將蝦那一會後用水沖乾淨
3. 咸蛋黃蒸12分鐘至熟後壓爛
4. 燒滾2湯勺油至9成，落蝦後熄火走油2分鐘後盛起
5. 熱鑊，細火落牛油及少許生油，油不要太滾，爆香蒜蓉、葱花及咸蛋黃，加入調味後炒散咸蛋黃
6. 將蝦回鑊，快手兜炒至收乾水即成





另外仲有煮左鮑魚仔，因為呢個簡單易煮又夠鮮味...最緊要揀d新鮮既同刷得乾淨..

果皮蒸鮑魚仔
材料:果皮1塊    鮑魚仔6隻      蔥半棵        紅椒仔1條
汁料: 紅椒仔1條       豉油2湯匙        糖半茶匙        水1湯匙       麻油 少許

做法: 1.果皮用水浸軟後切絲，蔥切成蔥花，紅椒仔切碎
2.鮑魚仔擦乾淨及挑去內臟，擦時小心鮑魚殼界手，可用少許豆粉擦鮑魚去黑
3.鮑魚仔沖水洗淨後抹乾，於鮑魚面稍界花
4.將果皮絲放於鮑魚仔上面，燒滾水後放入鮑魚仔蒸約8-10分鐘，取出倒去碟內的水
5.用細火燒熱1湯匙油，先爆香紅椒仔，落餘下的汁料拌勻煮至滾起，灑下葱花
6.將汁淋於鮑魚仔上即成





最後再煮埋一味照燒汁雞脾菇，呢個又係好簡單，不過煮完出黎個賣相可能唔係好靚，但好好味架=P


日式照燒汁雞脾菇
材料:雞脾菇2大條        蒜蓉1湯匙
汁料:生抽2茶匙　     味醂2茶匙       老抽1茶匙       糖1茶匙          料理酒1茶匙
生粉水: 生粉1茶匙        水1/2 杯

做法: 1.雞脾菇洗淨吸乾水後切細，用滾水加少許油及鹽汆水30秒後撈起瀝乾水備用，汁料拌勻備用
2. 熱油鑊，爆香蒜蓉，落雞脾菇兜炒
3. 落汁料與雞脾菇兜勻，煮至收乾後加生粉水埋芡上碟



最後整返張大合照 yeah =P

18 May 2013 日式銅鑼燒配自製豆沙餡 :)

一直都好中意食叮噹豆沙包，出面d豆沙餡多數好甜同有防腐劑，所以想試下自己整埋，自己整真係好味但好嘥時間，所以最好一次整多d，買半斤紅豆 (300g) 整出黎有double 份量既豆沙餡 (600g)，雪入冰格可以擺1個月~
另外我係$12店買左個圓形模，不過好廢，唔用佢都整到圓形，用左佢仲麻煩，同埋如果個平底鑊燶左就要清潔左先，唔係d焦會黏左係個銅鑼燒皮到，如果想好靚就最好逐個逐個煎，太熱就離火，整完今次我覺得好麻煩~~ 洗野都用左我好多時間~~~



日式銅鑼燒 (10個量)
銅鑼燒材料: 雞蛋3隻      砂糖40g       蜜糖30g       低筋麵粉150g       泡打粉 2茶匙      牛奶60g
豆沙餡材料: 紅豆300g     砂糖80g       鹽1/8小匙

豆沙餡做法:
1. 紅豆洗淨後浸水一晚至膨脹 (但不要浸過耐)
2. 用煲仔將紅豆(連浸紅豆的水)用大火煮滾後瀝乾水分，沖乾淨過水一次備用
3. 將紅豆加入3倍水煮滾，轉細火煮至紅豆爛(約2小時)，間中攪拌及加水保持水有蓋過紅豆的份量
4. 紅豆用手指輕按，感鬆散即可盛起用濾網過濾，如想口感完全綿滑無顆粒可放入攪拌機再攪爛
5. 濾好的紅豆倒入鑊中，用中火不停兜炒，重覆將底部的紅豆翻上面炒至收乾水，但不要炒得太乾
6. 最後加入砂糖拌勻，放涼冷藏

銅鑼燒做法:
1. 雞蛋放置室溫備用
2. 雞蛋放入大碗中先拂勻，加入砂糖用打蛋器打至全發 (約15分鐘)
3. 加入牛奶及蜂蜜拌勻
4. 將麵粉及泡打粉粉分次篩入，拌勻至無粉粒
5. 燒熱平底鑊，用廚房紙於鍋內抺好少好少的油
6. 開細火，用湯勺舀大半勺粉漿，讓粉漿自然滴落攤開成一片圓形
7. 粉漿煎至出現大氣泡後可反面再煎至金黃
8. 將煎好的銅鑼燒蓋上濕布保持濕潤放涼
9. 所有鬆餅煎好後夾入豆沙餡即成

17 May 2013 芒果魚柳飯

係街市見到芒果$10/4個，因為唔係好熟，所以買黎煮飯用，煮出黎其實甜甜地甘，當然唔似出面西餐廰個d芒果焗飯甘好味，因為我無焗爐整唔到焗芝士面，但都唔差既哈哈 =P 之後我諗應該可以舖上芝士再放入微波爐叮溶佢

白汁芒果龍脷柳飯
材料: 魚柳2塊      芒果1個        蛋2隻        冷飯2碗       雞粉半茶匙        芝士1塊
醃料: 鹽及胡椒粉少許
蛋漿料: 蛋1隻     生粉1湯匙
白汁料: 麵粉2湯匙     牛油1湯匙     牛奶200ml        鹽半茶匙

做法:
1. 魚柳解凍洗淨後抹乾水分並切件，於兩面稍拍上鹽及胡椒粉醃20分鐘
2. 芒果洗淨去皮去核後切粒備用，蛋漿料拌勻備用
3. 熱油鑊，將魚柳沾滿蛋漿，落鑊用細火煎至兩面金黃，肉厚的放中間煎，盛起備用
4. 蛋加少許鹽拂勻，熱油鑊，下蛋液煎至有少許蛋皮形成，加入冷飯炒勻，落雞粉炒至飯呈乾身，再加入芒果粒兜勻盛起
5. 熱鑊，轉細火下牛油煮溶，落麵粉慢慢拌勻，可加少許水推開，加入牛奶及鹽拌勻成白汁
6. 將炒飯上碟，放上魚柳及淋上白汁

28 Apr 2013 酸辣湯麵 :)

今日整酸辣湯麵，原來都幾易整架

酸辣湯麵
材料: 甘荀1條       木耳4朵      冬菇6隻        竹筍半條         瘦肉4兩        豆腐1磚
薑2片       上湯1,000ml         水500ml          雞蛋1隻         酒 1湯匙          上海麵半包
調味: 辣豆瓣醬2湯匙 鎮江醋4湯匙 老抽2湯匙 麻油半茶匙 胡椒粉半茶匙
醃料: 生抽1茶匙 糖半茶匙 生粉半茶匙 水1茶匙 麻油數滴
芡汁: 生粉4湯匙 水4湯匙

做法:
1. 竹筍洗淨切去根部削皮，切絲，凍水煮筍絲5分鐘後沖撈起沖水去澀味
2. 冬菇浸軟後切片，木耳浸軟去沙後卷起切絲，瘦肉切絲後用醃料醃30分鐘
3. 豆腐切絲備用，蛋拂勻備用
4. 熱油鑊，爆香薑片，落肉絲先兜炒一會，落酒
5. 加入冬菇絲、甘荀絲及竹筍絲炒勻後隔去油盛起
6. 燒熱煲，加入上湯及水煮滾，加入炒好的材料拌勻再煮滾
7. 轉細火，將辣豆瓣醬、鎮江醋及老抽攪勻加入湯中拌勻，芡汁料攪勻後加入湯中勾芡
8. 加入豆腐及麻油滾一會，熄火慢慢倒入蛋液，邊倒邊攪成蛋花
9. 上海麵另煮好，盛起備用
10. 酸辣湯盛起，拌入煮好的上海麵，依口味加入胡椒粉及額外的醋拌勻即成

21 Apr 2013 蕃茄蛋炒飯 :)

呢個簡易蕃茄蛋炒飯係跟台湾個廚司阿基師學既，今日好攰訓左晏教，所以晚飯就甘整呢個炒飯就算啦，只需15分鐘就完成!


蕃茄蛋炒飯
材料: 蕃茄2個      蛋4隻      蕃茄醬2湯匙         糖1茶匙         葱花1湯匙          冷飯2碗
調味: 鹽1/2茶匙

做法: 1. 蕃茄洗淨切粒，蛋拂勻成蛋液備用
2. 熱油鑊，先到約1隻蛋的分量煎成蛋皮，盛起待涼
3. 原鑊加少許油，大火落蕃茄粒炒香，下蕃茄醬及糖兜勻
4. 轉細火，倒入蛋液快手兜炒10秒，盛起備用
5. 原鑊加少許油，爆香葱花，下冷飯弄散，加入鹽炒勻至飯熱
6. 加入蕃茄蛋，與白飯一同炒勻至蛋熟
7. 蛋皮先放一大碗內，盛入炒好的飯，將一碟蓋於碗上，整個反轉即成

20 Apr 2013 蠔仔冬瓜肉碎泡飯

大B好中意食蠔仔，但我又唔食..於是煮左呢個簡單複雜版蠔仔冬瓜肉碎泡飯....簡單係我無落冬菜同方魚，複雜係因為我唔食蠔仔所以落埋冬瓜同冬菇..蠔仔我淨係買左6兩 $12，成個餸最麻煩係洗蠔仔，d蠔仔真係好污糟......
蠔仔冬瓜肉碎泡飯
材料: 蠔仔6兩        蒜蓉2湯匙         冬菇6隻         瑤柱3粒          中國芹菜1條          薑2片           上湯1杯          冷飯2碗             免治豬肉4兩
醃料: 生抽1湯匙　   糖1/4茶匙      生粉1茶匙      水1湯匙
調味: 雞粉1茶匙

洗蠔仔:1. 用疏窿筲箕盛住蠔仔浸於水中輕搖去沙石
2. 用生粉及粗鹽重覆洗擦蠔仔幾次，在水喉下沖水亦要不停左右搖動筲箕，瀝乾水份
3. 蠔仔加薑飛水備用

做法: 1.肉碎用醃料醃30分鐘，瑤柱浸軟撕成絲，冬菇浸軟後切絲，冬瓜洗淨連皮切粒
2. 熱油鑊，爆香蒜蓉˴冬菇˴瑤柱及肉碎
3. 熱鍋，加入雞湯˴冬瓜及中國芹菜煲至滾
4. 加入已爆香的蒜蓉˴冬菇˴瑤柱及肉碎稍煮
5. 加入冷飯及調味拌勻，最後加入蠔仔即成

 

19 Apr 2013 北角東寶小廚 :)

是日晚飯去北角東寶小廚! 其實住呢頭甘耐都係第2次黎食，之前聽人講好似水準開始變差，所以一路都無再黎，不過今次食完我又覺得ok禾~最好都係一大班人黎食甘先可以試多幾款餸 =P

東寶小廚
地址: 北角渣華道99號渣華道市政大廈2樓




黃金蝦好味..不過價錢真係幾貴

辣酒花螺真係幾辣



荷葉飯好好味..夠哂6個人食



炸豬手無咩肉食..幾肥下..唔扺



呢個好味~



呢個一般



食食下其中有個waiter無啦啦yo d 食客係度跳舞..d 外國遊好hyper 好開心呀~