28 Apr 2013 酸辣湯麵 :)

今日整酸辣湯麵，原來都幾易整架

酸辣湯麵
材料: 甘荀1條       木耳4朵      冬菇6隻        竹筍半條         瘦肉4兩        豆腐1磚
薑2片       上湯1,000ml         水500ml          雞蛋1隻         酒 1湯匙          上海麵半包
調味: 辣豆瓣醬2湯匙 鎮江醋4湯匙 老抽2湯匙 麻油半茶匙 胡椒粉半茶匙
醃料: 生抽1茶匙 糖半茶匙 生粉半茶匙 水1茶匙 麻油數滴
芡汁: 生粉4湯匙 水4湯匙

做法:
1. 竹筍洗淨切去根部削皮，切絲，凍水煮筍絲5分鐘後沖撈起沖水去澀味
2. 冬菇浸軟後切片，木耳浸軟去沙後卷起切絲，瘦肉切絲後用醃料醃30分鐘
3. 豆腐切絲備用，蛋拂勻備用
4. 熱油鑊，爆香薑片，落肉絲先兜炒一會，落酒
5. 加入冬菇絲、甘荀絲及竹筍絲炒勻後隔去油盛起
6. 燒熱煲，加入上湯及水煮滾，加入炒好的材料拌勻再煮滾
7. 轉細火，將辣豆瓣醬、鎮江醋及老抽攪勻加入湯中拌勻，芡汁料攪勻後加入湯中勾芡
8. 加入豆腐及麻油滾一會，熄火慢慢倒入蛋液，邊倒邊攪成蛋花
9. 上海麵另煮好，盛起備用
10. 酸辣湯盛起，拌入煮好的上海麵，依口味加入胡椒粉及額外的醋拌勻即成

21 Apr 2013 蕃茄蛋炒飯 :)

呢個簡易蕃茄蛋炒飯係跟台湾個廚司阿基師學既，今日好攰訓左晏教，所以晚飯就甘整呢個炒飯就算啦，只需15分鐘就完成!


蕃茄蛋炒飯
材料: 蕃茄2個      蛋4隻      蕃茄醬2湯匙         糖1茶匙         葱花1湯匙          冷飯2碗
調味: 鹽1/2茶匙

做法: 1. 蕃茄洗淨切粒，蛋拂勻成蛋液備用
2. 熱油鑊，先到約1隻蛋的分量煎成蛋皮，盛起待涼
3. 原鑊加少許油，大火落蕃茄粒炒香，下蕃茄醬及糖兜勻
4. 轉細火，倒入蛋液快手兜炒10秒，盛起備用
5. 原鑊加少許油，爆香葱花，下冷飯弄散，加入鹽炒勻至飯熱
6. 加入蕃茄蛋，與白飯一同炒勻至蛋熟
7. 蛋皮先放一大碗內，盛入炒好的飯，將一碟蓋於碗上，整個反轉即成

20 Apr 2013 蠔仔冬瓜肉碎泡飯

大B好中意食蠔仔，但我又唔食..於是煮左呢個簡單複雜版蠔仔冬瓜肉碎泡飯....簡單係我無落冬菜同方魚，複雜係因為我唔食蠔仔所以落埋冬瓜同冬菇..蠔仔我淨係買左6兩 $12，成個餸最麻煩係洗蠔仔，d蠔仔真係好污糟......
蠔仔冬瓜肉碎泡飯
材料: 蠔仔6兩        蒜蓉2湯匙         冬菇6隻         瑤柱3粒          中國芹菜1條          薑2片           上湯1杯          冷飯2碗             免治豬肉4兩
醃料: 生抽1湯匙　   糖1/4茶匙      生粉1茶匙      水1湯匙
調味: 雞粉1茶匙

洗蠔仔:1. 用疏窿筲箕盛住蠔仔浸於水中輕搖去沙石
2. 用生粉及粗鹽重覆洗擦蠔仔幾次，在水喉下沖水亦要不停左右搖動筲箕，瀝乾水份
3. 蠔仔加薑飛水備用

做法: 1.肉碎用醃料醃30分鐘，瑤柱浸軟撕成絲，冬菇浸軟後切絲，冬瓜洗淨連皮切粒
2. 熱油鑊，爆香蒜蓉˴冬菇˴瑤柱及肉碎
3. 熱鍋，加入雞湯˴冬瓜及中國芹菜煲至滾
4. 加入已爆香的蒜蓉˴冬菇˴瑤柱及肉碎稍煮
5. 加入冷飯及調味拌勻，最後加入蠔仔即成

 

19 Apr 2013 北角東寶小廚 :)

是日晚飯去北角東寶小廚! 其實住呢頭甘耐都係第2次黎食，之前聽人講好似水準開始變差，所以一路都無再黎，不過今次食完我又覺得ok禾~最好都係一大班人黎食甘先可以試多幾款餸 =P

東寶小廚
地址: 北角渣華道99號渣華道市政大廈2樓




黃金蝦好味..不過價錢真係幾貴

辣酒花螺真係幾辣



荷葉飯好好味..夠哂6個人食



炸豬手無咩肉食..幾肥下..唔扺



呢個好味~



呢個一般



食食下其中有個waiter無啦啦yo d 食客係度跳舞..d 外國遊好hyper 好開心呀~

14 Apr 2013 腐竹薏米雪耳糖水 :)

其實我好中意食中式糖水，不過大B中意食紅豆沙，我又唔中意食..
最後唔理佢..煲我至愛既腐竹糖水，通常唔加雪耳..不過我中意食所以加埋落去..其實都好夾架

媽媽話煲糖水要用連殼白果，煮餸先用真空個d wo..另外雪耳要揀顏色偏黃，漂白得較少而且尚未浸發過的..

腐竹薏米雪耳糖水
材料:連殼白果10粒          腐竹1包          生薏米30g          雞蛋2隻           冰糖100g         雪耳半個             水1,500ml

做法: 1.先把薏米沖水，並用水浸半小時備用，雪耳浸發2小時後剪細塊備用
2. 白果用毛巾包住並用菜刀輕輕將殼破碎，去衣後將白果肉切半並除去白果芯
3. 將腐竹沖水後浸1小時至軟，並撕成細片
4. 凍水落腐竹，煲滾後轉細火免滾瀉，期間不要冚蓋
5. 落薏米煲15分鐘後再落白果煲60分鐘至腐竹溶
6. 用凍水加些鹽烚蛋至熟，撈起放入冷水中，待稍涼去殼備用
7. 腐竹糖水加入冰糖及蛋，拌勻試味後即成

14 Apr 2013 日式薯仔碎蛋沙律 :)

大B好中意食沙律，甘啱又有薯仔甘荀淨，所以整薯仔碎蛋沙律
我覺得好味呀..點知大B話其實佢中意食有生果既沙律多d..
即刻down左..甘誠實..真係唔識哄女仔 >.<


日式薯仔碎蛋沙律
材料: 薯仔2個     甘荀2條         雞蛋2隻        鹽1/2茶匙         牛油2茶匙          蛋黃醬4湯匙    
牛奶1湯匙          香草少許

做法: 1.牛油預先放室溫1小時，甘荀及薯仔去皮後稍切大塊備用
2. 凍水落雞蛋烚10分鐘至熟，浸凍水待涼後去殼切粒
3. 煲滾水，下薯仔、甘荀及1茶匙鹽烚8分鐘後焗2分鐘
4. 薯仔及甘荀瀝乾水待涼2分鐘，薯仔切細粒後再稍壓爛成蓉，但要留一些細粒的增加口感
5. 甘荀切細粒，連同薯仔加入鹽及牛油拌勻，再加入牛奶拌勻
6. 最後加入碎蛋及蛋黃醬拌勻，灑下香草即成

無聊話: 買蛋黃醬個陣最初諗住去百佳買，見到日本丘比牌平過卡夫..不過好彩無買到，因為之後我係Aeon超市見到好野都平過百佳Welcome.. 卡夫蛋黃醬同奇妙醬唧唧裝買一送一，計落竟然平過日本丘比差唔多一半..其他醬都比出面大超市平$2-$3，但個日唔係感謝日..比錢個陣同收銀姐姐傾佢又話唔係做緊大減價..不過要買平野就要付出代價..就係排隊排左半個鐘…

13 Apr 2013 日式雜菜燉肉 :)

為左煮呢個餸要去Aeon超市買d日式醬料..我見一般都係煮薯仔燉肉，但我中意食菜所以落埋紹菜、日本菇同芋絲....其實可以用清雞湯代替木魚粉，但計計下一包木魚粉可以用好多次好似抵d =]我煮出黎既味道係偏淡既，想濃味d就加重調味


日式雜菜燉肉
材料:薯仔1個        甘荀1條            紹菜半棵               美國肥牛8片            洋蔥半個
蒜頭3粒            芋絲1盒            日本菇1包
調味: 醬油3湯匙 糖1茶匙 味醂2湯匙 木魚粉1湯匙 味噌2湯匙

做法: 1.甘荀及黃芽白切大塊，洋蔥切粗條，蒜頭略拍，日本菇洗淨撕細塊
2.將木魚粉、味噌及1杯水拌勻成上湯備用，餘下的調味料先拌勻放一旁備用
3.薯仔切大塊後削走尖角色免燉煮時糊掉，並浸水去黏液
4.熱油鑊，加入洋蔥炒軟，爆香蒜頭，落紅蘿蔔及薯仔兜炒一會員
5.加入上湯拌勻，煮至水滾後加入紹菜轉細火煮多約10分鐘，加入餘下的調味料拌勻
6.落肥牛及芋絲大火再煮滾後加蓋焗8分鐘至薯仔及紅蘿蔔變軟即成