DaiB siub 幸福事: 24 Jun 2012 首爾 Day 2 :) 景福宮+仁寺洞+梨大

尋晚睇戲睇到成3點先訓，但今朝9點就要起身，因為要去食仁蔘雞湯....係我好忙又要吹頭又要化妝既時候，大B已經搞掂好哂氣定神閒食多士....
一早天朗氣清，我地搭地鐵去到景福宮站，一落車己經要攞定相機，因為有好多影相位

月台有馬既石像，出左閘首先會穿過中間一個小型博物館，有少少歷史展品睇下

再行前就會見到呢個不老門，開始見到有d韓國宮廷既擺設，之後行前會去到一個好似地底隨度既地方，見到有班年青人提供景福宮free tour ，不過聽聞好雞..所以我地無理佢，左轉直接上樓梯，一出就望到景福宮啦，不過好曬好熱...

景福宮
路線:地鐵3號線景福宮站(Gyeongbokgung) 5號出口
門票: W3,000

因為時間尚早我地就買左入場票先同埋係正門度影下相

到左11點就落返地鐵站去另一邊既出口食土俗川仁蔘雞湯

土俗川仁蔘雞

路線:地鐵景福宮站2號出口→見土俗村蔘雞湯的示指牌→直走→見GS25左轉就到

去到已經有人排緊隊啦而且入面已經坐滿左，嘩原來真係甘爆…不過佢入面其實好大既，所以我地都係等幾分鐘就入得，但如果12點先黎可能就等好耐啦~

我地入左其中一個房，要除鞋同盤坐，我地只係叫左一份最普通既仁蔘雞 W15,000，另外有烏雞揀，當然貴幾多，我地志在試下又唔洗食到甘豪既，同埋呢度好係2個人都可以叫1個share其實我最中意食佢罐醃蘿蔔同泡菜，每枱一大罐任你食

將杯仁蔘酒倒埋入d碗仁蔘雞度就食得，其實2個人share 都好夠，因為食到尾我而經唔想再食，太多肉喇，不過d雞真係好滑好嫩，同埋佢真係好寶，平時大B如果食太多熱氣野一定會喉嚨痛，但我地食完仁蔘雞之後個幾日食好多生冷熱氣野都無事，又燒肉又街邊串燒又薯片都係靠佢咋 (其實可能唔關事不過心安理得d)

食完拿住個膠牌到門口counter比錢，出到黎門口已經有好長既人龍，我地行返去景福宮入場lu~

以今日係星期日黎講唔算多人，不過就真係好熱，我地要開遮擋太陽

過左勤政門一入去會見到正殿-勤政殿，先經過勤政殿外既廣場，地下豎立左九品到一品文武百官上朝既石牌，我地梗係要影正一品啦

之後上到黎勤政殿，但入面封左唔比入，只可以係出面影相，呢度係殿下上朝問政既地方但感覺幾簡陋，唔似中國故宮個d宏偉華麗

繞過勤政殿去到景福後面既部份，其實呢到好多地方都保留係沙地，並無鋪石磚個d，所以有d沙塵滾滾既感覺去到後面多數係空地顯得有d荒蕪，但有野玩wo..

我地係呢幾個紙牌公仔度影相玩左好耐，行前有一個湖，個景好靚架，好似幅畫甘

到左1點就出去光化門個度睇換班儀式，都幾特別值得一睇既，換班儀式完左仲可以企係d守衛側邊影相，不過最好唔好搞佢地喇，其實佢地好慘，大熱天時著住甘多衫仲要做d甘悶既工作.....太概用左1個半鐘參觀完景福宮，未睇過既當然值得黎一次既，不過我就覺得無咩特別…..

離開景福宮下一站我地就去清溪川

清溪川
路線:景福宮光化門直行→左邊見地下有一行黑色噴水位→見世宗像→經過紀念碑殿→到世宗大道→見巨形螺旋擺設→到清溪川廣場

清溪川路其實好長既，上網睇話有清溪8景: (1)清溪廣場 (2)廣通橋 (3)正祖班次圖 (4)色童牆及文化之牆 (5)洗衣臺 (6)希望之牆 (7)紀念橋墩及隧道噴泉 (8)楊柳溼地....不過我一個都認唔到..

由景福宮行出黎周圍環境都好舒服，又有綠化植物，地下有噴水位，d韓國人會帶埋小朋友一家大細黎玩水..

見到呢個瀑布就到清溪川啦

清溪川係朝鮮太宗時代是一條人工開出用以疏導河水的人工渠，行哂成條要3-4小時渠，原本充滿惡臭，期後市長李明博係清溪川進行復修，最後變成首爾好出名既合家歡悠閒耍樂景點

呢度真係好靚好舒服，我地黎到都要入鄉隨俗，搵個靚位除鞋浸腳!
嘩d水好凍冰冰，但浸浸下就覺得好爽，望落水底仲會見到有好大條魚係度游

我地一路傾計一路浸左好耐，隔離仲有個媽媽帶著2個仔浸住腳野餐，韓國人真係識嘆呀，浸完腳上水個陣有d狠狽，又要抺乾對腳又要好小心驚跌落水，個地下好滑

沿住清溪川一直行就會去到仁寺洞

仁寺洞
路線:到清溪川旅遊中心→對面見一十字路口→直行到安國站→安國站6號出口處→前行5分鐘→見GS25的街口左轉→仁寺洞大街

仁寺洞大街兩邊分佈好多胡同，呢度係主打年青活力+藝術氣息，首先梗係去人人商場朝聖，呢個商場無扶手電梯，沿住斜路一路向上行，其實得幾層，唔係行左好耐，因為大部分鋪頭係賣獨一無二既野，所以當然唔平，我都係睇下就算啦 >.< 不過最後我同大B都各自買到個背囊，我覺得幾靚架，至少唔係韓國街邊賣個d款，不過代價係要付出400港元...

行上頂樓仲有d特色裝飾，睇完就先落去地下買花生糖同紅豆屎餅....好味呀~
跟住去埋巷仔no.9間餃子店食炸餃子，其實係人人商場望落去地下都會見到佢個招牌架喇..

填飽個肚就到我去 Etude House血拼，我揀係仁寺洞呢間買一黎係因為可以用韓國觀光網print既coupon，二黎聽講呢度既sales態度好d =P

仲係 Too cool for school 買左1盒係eyeline gel 同眉粉2合1既…不過我用後發現佢唔持久..行行下又見到有間鋪仔專賣袋既，見幾平就買左個W10,000既手袋仔~