31 Mar 2013 :) 高麗韓國餐廳

同大b慶祝拍拖紀念日..去左北角高麗韓國餐廳食韓燒..
住左係北角10幾年第1次食..而且好細個個陣呢間餐廳已經係度
上網睇食評: 大部份人都話好味但服務生態度差而且好準時催你買單..
但既然有呢d負評仲可以開足20年而且成日爆場..一定有可取之處

我打電話去訂枱諗住訂7點半, 個服務生話最遲訂到6點半..之後要walk-in..
我問佢甘今晚booking 爆唔爆 (當時已經係5點半)..佢話未爆..甘我地就walk-in啦..
其實佢態度唔算差但好似唔休做甘囉

7點去到發現: 原來佢真係唔休做! 超爆場…間餐廳仲要係好大既..
門口個經理叫我地坐底等下..話有枱7點半走..無得攞飛要坐係門口等..
期間聽到佢同打黎訂枱既客講電話..大概係話: 呢個鐘數要walk-in架啦..你有無興趣先? 有興趣咪黎等下囉….

隔一陣個經理話有人訂左枱但唔黎..可以比我地先..
坐底就即刻出去攞野食…有免費茶飲.. 叫菊花茶同酸酶湯$38渣

餐前小食已經有10幾款..推介:泡菜、炒粉絲、醃青瓜、魚乾仔、薯仔
燒物亦有20幾款.. 推介:牛仔骨、鮮牛肉、西冷、豬扒、雞翼、青口、魚柳、蝦
熱盆有: 炸曼頭、燉牛尾、薑醋蛋、仁蔘雞湯…

食左1個半鐘個陣服務員攞左張單黎叫我地埋左先..之後我地繼續攞野食繼續燒..
無人趕我地..最後我地食左2個半鐘!! 我諗係無人等位先甘好咋…

總結: 好味又坐得舒服..價錢雖然比其他任食韓燒既稍貴..

但佢d肉同小食有好多款..仲要擺得好整齊..d牛肉真係一大塊原整既..唔似出面其他任食甘好散好碎..

無分時段..入坐起計
星期一至四: 2小時
星期五至日: 1.5小時 $158再加一

28 Mar 2013 :) 自製雞肉漢

之前用淨1 pack咖哩磚，所以今日整咖哩飯，諗住唔買超市個d漢堡扒，想自己整健康d，最後決定整雞肉漢堡


雞肉漢堡
材料: 冬菇3隻         嫩豆腐半盒         雞胸肉2塊          蛋白1隻          生粉1湯匙          蔥碎1湯匙
醃料: 蒜蓉1湯匙            日本淡醬油(壽司醬油) 3包              雞粉1茶匙                  糖半茶匙
白胡椒粉1/4茶匙          米酒1茶匙             麻油半茶匙

做法:
1. 冬菇浸軟後切碎，蔥同蒜蓉要切得好碎
2. 雞胸肉切去脂肪和筋膜，剁碎後用醃料醃20分鐘 (大概剁15分鐘)
3. 雞胸肉醃好後加入冬菇碎、嫩豆腐、蔥碎、生粉及蛋白攪勻後撻至起膠
4. 一手取一團雞肉料，用手指公同食指擠出一團團雞肉料後壓平，要整得薄d煎出黎會香口脆脆地
5. 熱油鑊，將雞肉漢堡煎至金黃色即成

23 Mar 2013 維園花展 HK Flower Show 2013 :)

一年一度花展又到喇, 今年主題花係石斛蘭
同大B下晏4點先出發, 人流唔算多, 加上天氣幾好, 周圍行都唔覺得熱!
不過我覺得今年無上年甘靚, d花無甘鮮艷同壯觀, 好似上年好大既鬱金香花田係今年細左好多, 反而多左好多賣盆栽同相關產品既舖頭

*花+鏡的組合

*用花拼成面具


*海洋公園都有參展




*抽象派插花藝術




*又係少女又係兔仔




*一望到佢就忍唔住笑





*今年既鬱金香花田, 比起上年細仲要側邊多左d其他花





*今場門票同其中一個講oasis 既booth派既書籤


*上年既鬱金香花田, 顏色鮮艷範圍又大, 有好多人圍住

16 Mar 2013 洋蔥豬扒+ 蘿蔔芽菜炒魚片:)

通常見網上食譜淨係芽菜炒魚片，但我好中意食白蘿蔔，所以今次加埋落去炒，
味道幾好呀! 而洋蔥豬扒最好食嘅係啲洋蔥，甜甜地送飯好好味，下次會將洋蔥份量double!


洋蔥煎豬扒
材料: 薄梅頭豬扒5塊    洋蔥1個
醃料: 蒜蓉2湯匙　    　生抽2湯匙　　    老抽1湯匙　   　糖1茶匙　    　蛋白1隻      
生粉1茶匙　　油1湯匙
調味: 老抽2湯匙　　糖1茶匙　

做法:
1. 豬扒解凍沖淨血水，用大菜刀背係豬扒兩面井字形咁啄鬆(大概每面啄2次)
2. 先用醃料A將豬扒醃20分鐘，後加醃料B醃多30分鐘
3. 洋蔥去皮切絲備用，調味料拌勻備用
4. 燒熱油鑊，猛火爆香洋蔥至有香味及有少許燶，下調味料兜勻炒至洋蔥軟身後盛起備用
5. 原鑊加少許油，落豬扒及所有醃料，豬扒先煎好一面再反轉煎另一面至熟
6. 落炒好嘅洋蔥，加大半碗水約蓋過豬扒面，冚蓋煮約6-8分鐘，最後加少許生粉水埋芡就得

蘿蔔芽菜炒魚片
材料: 白蘿蔔1條          魚片半條        銀芽1斤        蒜蓉數粒               薑片數塊
粗鹽一大撮          酒1湯匙             蔥段少許               黑椒碎少許
調味: 鹽 1/2茶匙          糖1/2茶匙             雞粉1茶匙

做法: 
1. 魚片洗淨切條，銀芽沖水洗淨，白蘿蔔洗淨去皮切條
2. 先將魚片及銀芽汆水，可以去油去臭青，盛起備用
3. 白蘿蔔加入一大撮粗鹽撈勻，靜待20分鐘，佢會出水
4. 將白蘿蔔碗內的水倒掉，用清水稍沖淨白蘿蔔的鹽，瀝乾水備用
5. 燒熱油鑊，爆香薑片及蒜蓉，下魚片炒香後盛起備用
6. 原鑊下白蘿蔔兜炒，澆下酒，冚蓋煮約5分鐘 (白蘿蔔本身仲有少許水份，唔怕煮燶但都要睇火)
7. 加入魚片及銀芽，加入調味料兜炒幾下，最後灑少許黑椒碎及蔥段就得 (白蘿蔔加黑椒碎辣辣地幾惹味)